Pas një seminari trajnues, në të cilën medresistet morën pjesë në dhjetorin e kaluar, organizuar nga Fondacioni për Zhvillim i Forumit Shqiptar (AFALC), dhe pas një pune intensive të bërë gjatë kësaj kohe, ishte dita e enjte e 18 prillit 2013, ajo që do shënonte në një farë mënyrë edhe finalizimin e këtij projekti, sipas të cilit ky fondacion në bashkëpunim me Universitetin Amerikan të Tiranës organizonte në ambientet e këtij të fundit, me pjesëmarrjen e komuniteteve fetare në vend, me qëllim ripërtëritjen e artizanatit edhe në spektrin fetar.
Të shumta ishin punimet me të cilat medresistet u prezantuan në këtë panair, e ndërkohë shumë i madh ishte edhe interesimi i të pranishmëve. Nxënëset medresiste ishin përpjekur të sillnin motive të shumëllojta në këtë drejtim, të fokusuar kryesisht në punimet në qëndistari, në grep etj. Interes përbënin edhe punimet bizhuterike të këtij lloji, të cilat sillnin një estetikë dhe një finesë të dukshme.
Të shumta qenë edhe punimet e sjellura nga komunitete e tjera që kishin sjellur një larmi, duke u dhënë ngjyrime të shumta këtij panairi. Nxënëset ishin të emocionuara jo vetëm nga prezantimi dinjitoz, por edhe nga atmosfera e krijuar. Të pranishëm ishin edhe drejtues të lartë të Fondacionit AFALC si dhe administratori i përgjithshëm i Universitetit Amerikan të Tiranës z Lulzim Ndreu, të cilët mbetën të befasuar nga punimet e vajzave medresiste, nga puna e vullnetshme e tyre dhe nga guximi që kishin marrë për të investuar me kohën e tyre të vlefshme në këtë drejtim, përveç përgatitjeve të tyre mësimore.
Aktivitete të tilla natyrshëm synojnë përherë të nxisin brezin e ri në ripërtëritjen e kësaj kulture, që përbën edhe një prej bazave kyçe të traditës sonë shqiptare si dhe të forcojë lidhjet dhe marrëdhëniet ndërinstitucionale duke ofruar mundësi njohjesh dhe shkëmbimesh të reja eksperiencash jo vetëm në këtë drejtim, por edhe në përgjithësi në fusnë e arsimit dhe të kukturës. Padyshim që një vend qëndror në këtë investim zë edhe mbështetja financiare që jep si përherë Shoqata “Istanbul”, e cila për vite me radhë vijon të japë kontributin e saj të shumëanshëm për ripërtëritjen e kulturës dhe të traditës vendase dhe më gjerë.
Menjehere pas aktivitetit ne qytetin e Pukes, datë 13 Prill 2013, grupi i medresistëve vijoi rrugën drejt Prizrenit, pasi ishin besimtarët e këtij qyteti, të cilët në një organizim të Bashkësisë Islame dhe Koordinatorit për Çështjet fetare në këtë qytet z Idriz Keskin, kishin organizuar një mbrëmje fetare për nder të Datëlindjes së Profetit Muhamed (a.s.). E megjithëse të mësuar në rrjedhën e larmishme të programeve fetaro-kulturore, medresistët vijonin të mbartnin emocione të shumta për një tjetër publik që i prisnin ngrohtësisht.
Një prezantim dinjitoz i nxënësve tanë në një shfaqje të tillë, ku natyrshëm nuk mungonin figura të njohura të vendit, personalitete të pushtetit vendor dhe lokal. Salla ishte mbushur e tëra, si një shprehje e mbështetjes dhe padyshim e nevojës shpirtërore që kanë këta njerëz për pak çaste meditimi.
Recitimet profesonale të fëmijëve, ilahitë meditative dhe pjesët e ndryshme artistiko-fetare do të pushtonin zemrat e të gjithëve, duke u lënë mbresa të pashlyeshme, emocione që do ngeleshin gjatë në kujtesën e gjithsecilit të pranishëm.
Edhe këtë herë nuk mungoi mbështetja e përhershme e shoqatës “Istanbul” e cila vijon në përmbushjen e qëllimeve të saj si në rimëkëmbjen e vlerave fetaro-kulturore ashtu edhe në forcimin e marrëdhënieve dhe bashkëpunimeve mes vendeve.
SHOQATA ISTANBUL 