Me ftesë së Shoqatës së Artizaneve Shkodrane Vajzat e Medresesë u ftuan në Panairin Kombëtar të Artizanatit që u zhvillua më 20 Qershor në ambientet e Muzeut Hitorik Kombëtar në Tiranë me pjesëmarrjen e shumë artizanëve të ardhur nga të gjitha rrethet e Shqipërisë. Medresistet ftohen në një aktivitet të tillë pas një pune intensive që kanë bërë gjatë gjithë vitit për zhvillimin dhe ripërtëritjen e traditës së bukur të artizanatit aktivitete këto që u mbështetën si përherë nga Shoqata V H K ‘Istanbul’ nën përkujdesjen dhe orientimet e zj. Artensa Tufi si drejtuese e artizaneve të Shkodrës.
Në Tiranë nxënëset u pritën mjaft ngrohtësisht nga drejtoresha e artizaneve shqiptare dhe në të njëjtën kohë drejtuese e bordit të grave të Biznesit shqiptar zj. Flutura Xhabija e cila shprehu konsideratën e saj të lartë për punën e palodhur që nxënëset kishin bërë gjatë gjithë kësaj kohe. Ajo dha një pasqyrë të gjërë të aktivitetit që ushtrohet për ripërtëritjen e kësaj tradite të mrekullueshme dhe u interesua nga afër me punimet e vajzave. Ajo u premtoi se kjo pjesëmarrje e tyre nuk do mbetej me kaq por do vijojë edhe me bashkëpunime të tjera që këto vlera të marrin përmasa akoma edhe më të gjera dhe të shtrihen në të gjithë vendin pasi mundësitë dhe dëshira për punë asnjëherë nuk mungojnë.
Ceremonia e hapjes së aktivitetit u zhvillua pasdreke me pjesëmarrjen e figurave të rëndësishme të pushtetit vendor, përfaqësues të Ministrive të Ekonomisë dhe të Kulturës si dhe përfaqësues të Bashkisë së Tiranës. Gjatë kësaj ceremonie u vu theksi në domosdoshmërinë e rritjes së mbështetjes dhe investimeve në këtë drejtim si dhe u shpalosën platforma që do e çojnë akoma më tutje këtë traditë të mrekullueshme.
Të pranishmit u interesuan nga afër me punimet e nxënëseve medresiste të cilat si përherë befasojnë publikun me punimet e tyre mjaft kreative. Vlen për t’u theksuar se interesimi i të pranishmëve nuk ngeli thjeshtë vetëm në punimet që vajzat paraqitën, përkundrazi ata gjetën mundësinë edhe të informoheshin për çështje të ndryshme fetare të cilave nuk kishin arritur t’i jepnin përgjigje më parë.