Pas atmosferës mbreslënëse që ofroi shtrimi i yftareve për gjatë muajit të madhnueshëm të Ramazanit në ambientet e Medresesë së Vajzave, Shoqata “Istanbul” ka vijuar shtrimin e yftareve edhe në Pukë si për të përcjellur këtë atmosferë edhe në këtë zonë veriore dhe për t’u qëndruar sa më pranë edhe besimtarëve të kësaj zone.
Një bashkëpunim i ngushtë më Myftininë e Pukës ka mundësuar së pari shpërndarjen e disa ndihmave në ushqime me rastin e këtij muaji të bekuar, për të përcjellur begatitë dhe mirësitë e këtij muaji në shtëpitë e besimtarëve në nevojë. Përfaqësues të shoqatës “Istanbul” të shoqaruar edhe nga Myftiu i Pukës z. Gëzim Kopani u janë drejtuar familjeve në nevojë me pako ushqimesh duke marrë në të njëjtën kohë edhe lutjet e përzemërta të tyre.
Më pas është vijuar me shtrimin e yftarit në ambientet e oborrit të xhamisë së qytetit, ku me dhjetra besimtarë u janë bindur urdhërit hyjnor duke pritur me lutje dhe dashamirësi momentin e thirjes së ezanit për t’i dhënë fund edhe agjërimit të ditës. Pas përshëndetjeve të rastit të bëra nga i zoti i shtëpisë, myftiu z. Gëzim Kopani dhe kryetari i shoqatës z. Ridvan Seferaj, të cilët i kanë uruar besimtarët për ditët dhe netët e bekuara që po kalojnë në këtë muaj të shenjtë, ata kanë dhënë mesazhe paqeje dhe harmonije që mirësitë e këtij muaji ta shtojnë edhe më shumë vëllazërinë mes njëri-tjetrit aq të nevojshme për kohët që jetojmë, besimtarët e pranishëm për mirësi dhe harmoni, paqe dhe begati përherë.
Në ditët e tjera Shoqata “Istanbul” ka vijuar punën e saj në ofrimin e ndihmave ushqimore dhe shtrimin e yftareve edhe në Mamurras dhe në Koplik. Edhe në këto vende nuk ka munguar atmosfera festive që përçon muaji i shenjtë i Ramazanit dhe lutjet e përzemërta të besimtarëve jo vetëm për shoqatën “Istanbul” por për mbarë vëllezërit turq që nuk i harronë vëllezërit e tyre shqiptarë në çdo kohë dhe ditë të shënuar.
Vijon sërishmi tradita e mrekullueshme e shtrimit të iftareve në ambientet e Medresesë “Haxhi Sheh Shamia” Dega e Vajzave, organizuar me shumë kujdes dhe përkushtim nga Shoqata “Istanbul”, e cila prej vitesh u ka hapur dyert shtresave të ndryshme të popullsisë duke e kthyer tashmë në një traditë të shumëpritur për të gjithë.
Në një ambient mjaft të këndshëm dhe komod, në një atmosferë ku mirësia e Ramazanit ndjehet në çdo kënd, të ftuarit e ndryshëm çdo natë ndjehen si në 
shtëpitë e tyre. Në fytyrat e tyre sheh ngrohtësi, kënaqësi, buzëqeshje, mirënjohje, sheh respekt dhe dashamirësi. Të gjithë të ulur në një tryezë pa dallim posti, ngjyrimi apo moshe shijojnë mirësitë dhe begatitë e këtij muaji të madhnueshëm.
I begatë është ky muaj që njerëzit i mbledh në një tryezë duke i bërë vëllezër të njëri-tjetrit dhe duke thyer atë akullnajë që i ka mbërthyer njerëzit këto vitet e fundit, duke shkurtuar këto distanca që i kanë bërë njerëzit të largët edhe pse të një gjaku, me pretekstin e ngarkesave të shumë që sjell përditshmëria.
Muaji i shenjtë i ramazanit është një motivim për t’ë bashkuar zemrat e njerëzve në një të vetme dhe për t’ju kujtuar të gjithëve se kemi ardhur në këtë jetë nga një nënë dhe një baba me të vetmin qëllim, adhurimin e Krijuesit të Gjithësisë, se të gjithë jemi të përkohshëm në këtë jetë dhe ajo që ngelet është fjala dhe vepra e mirë.
Këto sofra tradicionale do vijojnë të shtrohet për gjatë gjithë netëve të këtij muaji të begatë dhe të gjithë ne do përpiqemi të ngjisim shkallët e devotshmërisë për të qenë sa më afër Allahut të Lartmadhëruar si rob të ndërgjegjshëm në rrugën e Tij. Çdo përfundim yftari njerëzit largohen me urimin më të përzemërt “Allahu ua shpërbleftë me të mira” dhe na mjafton kjo lutje që të ecim me hapa të sigurtë në rrugën e shërbimit dhe të devocionit.
Është pritur ashtu siç i takon një personaliteti të madh, në mënyrë madhështore dijetari i shquar Islam, hirësia e tij Osman Nuri Topbash në vizitën e tij të bërë në Shkodër të enjten e parë të Qershorit. Drejtuesit e lartë të shoqatës “Istanbul” i uruan mirëseardhjen në ambientet qëndrore të shoqatës, ku më pas ka vijuar me programin që medresistet kishin organizuar në ambientet e Medresesë së Vajzave.
Më pas hirësia e tij ka vijuar programin me takime të përzemërta ne qendrën e shoqatës. Një vend i rëndësishëm i është kushtuar Shtëpisë Botuese “Prograsi” ku Dijetari i shquar Topbash është njohur më nga afër me punën e bërë në këtë institucion.
Më pas vizita ka vijuar më Medresenë e djemve, në sallën e konferencave ku hirësia e tij ka ligjëruar përpara qindrave të pranishmëve të ardhur nga të katër anët e vendit dhe viset shqiptare. Interesi ka qenë mjaft i madh dhe kjo është vënë re edhe nëpërmjet pyetjeve të shumta që iu drejtuan.
Më pas dijetari i shquar Topbash ka vijuar një takim si në drejtorinë e shkollës ku është njohur më nga afër me arritjet e deritanishme të Medresesë si dhe projektet e së ardhmes ashtu edhe me nxënës të medresesë nga ku hirësia e tij u ka dhënë shumë mesazhe jetike të rinjve medresistë.
Dita e Premte e datës 17.05.2013 ka shënuar një vizitë historike të Kryetarit të Komunitetit Mysliman të Turqisë Prof. Dr. Mehmet Gormez në Shkodër, i shoqëruar nga zv/kryetari Prof. Dr. Hasan Kamil Yilmaz dhe delegacioni shoqërues. Vizita ka startuar në Medresenë “Haxhi Sheh Shamia” Dega e Vajzave, ku është pritur në mënyrë madhështore nga i gjithë stafi mësues – nxënës i Medresesë së Vajzave, të cilat i kanë uruar mirëseardhjen nëpërmjet një poezie titulluar “Seni gormeden sevdik/Të deshëm 
pa të parë” dhe me buqeta lulesh të freskëta, simbol i Profetit të nderuar Muhamedit (a.s.) Më pas vetë hirësia e tij Prof. Dr. Mehmet Gormez ka përshëndetur gjithë stafin duke dhënë në të njëjtën kohë mesazhe të rëndësishme nëpërmjet një historie marrë nga jeta e profetit të nderuar.
Vizita ka vijuar më pas në faljen e Xhumasë në xhaminë e Parrucës, nga ku hirësia e tij ka përshëndetur të gjithë të pranishmit duke shprehur falënderimet e përzemërta për mikëpritjen e rezervuar.
Pas faljes së xhumasë dhe vizitës në Myftininë e Shkodrës, hirësia e tij ka vijuar në Medresenë e Djemve, ku edhe aty nuk kanë munguar mesazhet domethënëse dhe jetike për djemtë e medresesë. Ndër të tjera ai u shpreh se nxënësit medresistë 
duhet të njohin shumë mirë ajetet Kuranore, argumentet e Allahut në univers si dhe argumentet në lidhje me natyrën e gjithsecilit prej tyre dhe vetëm duke njohur shumë mirë Allahun dhe të Dërguarin mund të bëhen myslimanë dhe besimtarë 
të devotshëm. Ai theksoi gjithashtu se duhet të përcaktojnë qëllimet afatgjate në jetën e tyre, pasi secili mund të jetë një lider i të nesërmes. Ai i përgëzoi që kishin zgjedhur këtë shkollë për arsimimin e tyre dhe natyrshëm përgëzoi edhe prindërit dhe mësuesit për punën e mrekullueshme në edukimin e tyre. Ai shprehu falënderimet e posaçme edhe për shoqatën “Istanbul” si mbështetëse e fuqishme e kësaj sipërmarrjeje madhështore duke dërguar falënderime të posaçme për liderin e shoqatës, hirësinë e tij z. Osman Nuri Topbash dhe gjithë ekipin e tij.
Pas disa vizitave në disa pika kryesore të qytetit dhe në përfundim edhe me Kryetarin e Bashkisë z. Lorenc Luka, Prof. Dr. Mehmet Gormez u largua nga Shkodra me përshtypje mjaft pozitive nga ky qytet i traditës dhe i kulturës.
Çdo grup shoqëror përpiqet të ndjekë dhe të marrë si shembull prijësin e tij. Nëse prijësi gëzon dashurinë dhe respektin e popullit atëherë çdo veprim i tij merret si model nga shoqëria. Veçanërisht kjo gjëndje fiton një përmasë krejt tjetër, kur ky nuk është vetëm prijës politik por në të njëjtën kohë është edhe udhëheqës shpirtëror, duke arritur kulmin, kur përkrah këtyre dy cilësive është edhe i ngarkuar nga Krijuesi i Gjithësisë me detyrën e përçimit të mesazhit hyjnor tek njerëzit. Në këtë rast përvetësimi, shembulli dhe ndjekja e tij konsiderohet virtyt dhe vlerësohet si ibadet.
Nisur nga kjo, Medreseja “Haxhi Sheh Shamia” ka marrë përsipër të shpalosë para publikut të gjerë mbarë shqiptar këto vlera të larta njerëzore të këtij personaliteti universal, dhe duke qenë se këto vlera janë kaq të shumta dhe të panumërta, pasi vetë Profeti Muhamed ishte i dërguar për gjithë njerëzimin mbarë, këtë detyrë kaq me përgjegjësi kjo shkollë gjykoi ta realizonte në atë mënyrë që çdo vit të sjellë për publikun e nderuar aspekte të ndryshme të këtyre vlerave të larta njerëzore, t’ju rikujtojë njerëzve se kush ishte ky personalitet që mposhti të gjitha epokat e historisë duke zënë vend në 
piedestalin e njerëzimit dhe duke u bërë shembull në çdo aspekt jetësor. Muhamedi (a.s.) krahas imanit hodhi themelet për krijimin e një shoqërie ideale dhe një qytetërimi madhështor. Përmes tij njerëzimi shpëtoi nga botëkuptimi pagan, duke përvetësuar parime që do ta çonin në kulmin e marrëdhënieve ndërnjerëzore. Ndër shumë parime të jetës qytetare Pejgamberi (a.s.) u mësoi njerëzve dashurinë, mëshirën, solidaritetin dhe ndihmën reciproke. U mësoi devotshmërinë, u mësoi të qëndronin larg nga gjërat e ndaluara, U tregoi se të pasurit kanë detyrime mbi të varfërit. Ua qëndisi në zemër besimtarëve se sadakaja më tepër se mirësi është detyrim për besimtarët. Duke inkurajuar për bujari u bëri të qartë se besimi dhe koprracia nuk mund të gjënden në një zemër.
Këtë vit programi “PËRJETËSISHT ME TY” fokusohet në realitetin e gruas. Muhamedi (a.s.) i konsideroi si amanet bashkëshortet dhe i këshilloi sahabët ta ruanin në mënyrën më të mirë amanetin dhe për këtë tregoi shembullin e vet. U tregoi se myslimani më i mirë dhe më i devotshëm është ai që sillet mirë me bashkëshorten e vet. Femrën e 
vlerësoi si pasurinë më të shtrenjtë të kësaj bote. Një tjetër parim i Pejgamberit është fshirja e të gjitha dallimeve dhe ndasive racore apo sociale. Ai u mësoi njerëzve se një arab nuk ka përparësi ndaj një joarabi, as një i bardhë ndaj një i zi. Dallimi ekziston vetëm në mirësi dhe devotshmëri. Nxitja për t’u pajisur me dituri përbën një nga shembujt më të qartë të Profetit. Ai e konsideroi obligim kërkimin e diturisë për besimtarët, gjë e cila bëri që besimtarët ta kërkojnë diturinë në çdo cep të botës, duke përhapur dritën e dijes në gjithë rruzullin tokësor.
SHOQATA ISTANBUL 